Chiwetalu Agu: What happened to Chiwetalu Agu di popular Nollywood actor? – See wetin Nigerian Army tok – BBC News
Wia dis foto come from, Others
Nigerian Army don confam say dem arrest Nollywood actor Chiwetalu Agu.
According to statement form di army HQ, dem arrest am as im dey ginger members of di public and for support for di proscribed Indegenous People of Biafra (IPOB).
Dem add say dem pick di actor wey wear di cloth attire of di proscribed group, for questioning and although im bin resist wen di troops make effort to take am into custody, dem say dem no assault or brutalize am.
Di statement also add say while di NA recognize di rights of citizens to freedom of movement and expression as e dey for di constitution of di Federal Republic of Nigeria, na also violation for any individual or group to incite di public to cause mayhem or break down of law and order.
Dis one dey come as one viral video bin show how some men wey wear military uniform stop Popular Nollywood actor, Chiwetalu Agu for Onitsha, Anambra state.
Immediately afta dis video go viral, news come begin dey spread for social media say di men in military uniform arrest di actor.
For di video wey don full every where for internet, some men in military uniform stop one green mini bus wey dem write 'Chukwuwetalu films'. Dem begin drag di actor as e come down from di bus.
Di struggle between Chiwetalu Agu and di men wey wear military uniform continue sotey crowd of pipo start to dey gada but gunshot sound come make pipo begin run comot from di scene.
Last Month, Agu bin go viral for social media afta e wear outfit wey dem make with Biafran Flag.
Wia dis foto come from, others
Dis im outfit make many Nigerians to begin comment wey even make some pipo to hala say 'nothing must happen' to Chiwetalu Agu.
Di Biafran flag na di official emblem of di proscribe Indigenous People of Biafra (IPOB) group.
Di Separatist group wey dey south-east of Nigeria don dey push for independent country and dia campaign lead to violence wey make Nigeria government proscribe dem.
Even though citizens get right to protest, Nigeria constitution no recognise call for breakaway kontri or hoisting of flag wey no dey recognised.
Chiwetalu Agu wey dey popularly know as Ichie Ogwu na ogbonge Nollywood actor and comedian.
Di actor come from Enugu, South-East Nigeria and e don begin began acting long before di coming of Nollywood.
E feature for di Nigerian Television Authority Channel 8 Enugu's Ikoro also feature for ETV Channel 50 now ESBS for Baby Come Now and Ripples wey Zeb Ejiro produce.
Chiwetalu Agu don feature for plenti movies like Taboo, where e play di role of Ichie Ogwu Wedding Party 2
Agu dey popular for im humor and invention of customized phrases and slangs for movies wey dey make am fun to watch.
E be one of di most outstanding comic actors for di kontri.
Di actor na all rounder for im acting role, e also dey know to shift from comic role to wicked roles.
© 2021 BBC. De external site no concern BBC. De way wey we de take go external link.