NINAS NEWS Edwin Tech  

Boko Haram: How Six women and nine children escape from di militants hand afta months in captivity – BBC News

Wia dis foto come from, BORNO STATE GOVERNMENT
Some of di women, dia pikin with Borno state goment officials
Six women and nine children escape from Boko Haram afta dem waka for six days inside bush according to commissioner of women affairs Zuwaira Gambo wey present di escapees to Borno state Govnor Babagana Zulum on Monday.
No be from di same place Boko Haram kidnap di 15 pipo as some of dem come from villages for neighbouring Adamawa and Yobe state.
Dem kidnap three of di hostages and dia five children from Takulashi village for October last year while some of di rest na from Cofure village for Adamawa state and dia own kidnap happun for May dis year, dis na wetin di women affairs commissioner tok.
Di women, including one wey dey eight-month pregnant from Cofure, "trek for six days" from Buni Yadi forest for Yobe state to Damboa town for Borno, distance of around 90 kilometres (56 miles), Gambo tok.
'Boko Haram kill my soldier pikin'
"I dey very happy to receive una my daughters afta una don suffer for di hands of terrorists and I go do everything to support and help una." Dis na wetin Govnor Zulum yan as e receive dem.
According to Sani Usman wey be resident for Borno state and understand di environment very well, di escape of di women show serious strength and perseverance.
"No be small suffer dis pipo suffer because di environment wey dem follow escape dey very tough with no water for most of di waka."
"Dem show very good strength and dem need serious rest and medical attention because to dey inside bush for six days no be small tin."
Commissioner of women affairs and social development Zuwaira Gambo tell BBC Pidgin say di escapees dey very secured location at di moment and goment go do all it can to support and re-integrate dem into society.
Wia dis foto come from, Borno state government
One of di women wey escape with her pikin
Dis no be di first time wey pipo dey escape from Boko Haram hand, some of di kidnapped Chibok girls bin escape from di group hand one time or anoda.
A few of di Zabarmari rice farmers also escape before Boko Haram kill di remaining ones during dia raid on rice farms last year.
At di moment, many pipo feel say di group don lose most of its powers and dey hang by thread after di reported death of leader Abubakar Shekau and arrest and death of many of dia fighters.
Just two months ago hundreds of Boko Haram fighters also give up arms and enta town wia dem meet goment to seek amnesty and re-integration.
© 2021 BBC. De external site no concern BBC. De way wey we de take go external link.


Leave A Comment